Maiatzean, Asilo, Babes eta Nazioarteko Babesaren inguruko prestakuntza-ekintza bat izan da Bilbon (hilaren 16, 17 eta 18an) eta Donostian (hilaren 23, 24 eta 25ean), Herri Arduralaritzaren Euskal Erakundearen (IVAP) eta EUDELen arteko prestakuntza-hitzarmenaren baitan. Prestakuntzako ekintza horren antolaketa-lanetan parte hartu dute Bake eta Bizikidetzako Idazkaritza Orokorrak eta Enplegua eta Gizarte Politikak Sailak. Sail horrek, BILTZENen bidez, programa eratu du eta koordinatu egin du administrazioaren hiru arloetatik eta EAEn errefuxiatuei harrera egiteko lanetan aritzen diren erakunde sozialetatik etorritako irakasle talde handi bat.

Bizkaia eta Gipuzkoa Lurralde Historikoetako udaletako gizarte-zerbitzuetako teknikariei zuzendutako prestakuntza-ekintza izan da eta  hau izan da helburu nagusia: “ezagutzak eskuratzen eta esperientziak ezagutzen laguntzea, udaletako zerbitzuek Euskadira nazioarteko babes eske iristen diren pertsonei hobeto erantzun diezaien”.

Hiru goizetan eskainitako saioetan, honako eduki hauek landu zituzten:  asilo, babes eta nazioarteko babesaren inguruko araudi-esparrua; aniztasuna kudeatzeko elementuak, esku hartzeko beharrezkoak direnak; esku hartzeko erakunde-esparrua; GKE-en esku-hartze prozesua Euskadin.  Prestakuntza-jardunaldiaren amaieran mahai-inguruak egin zituzten zenbait errefuxiaturekin.

Apirilaren 20an, ostiralean, Eusko Jaurlaritzaren “Aholkusarea” sareko prestakuntza-ekintzen baitan Biltzenek antolatutako laneko saioa egin genuen Errumaniako Kontsuletxearekin, erakunde publikoekin eta erreferentziazko gizarte-elkarteekin batera. Horien artean, Bizkaiko eta Gipuzkoako Aldundietako Haurtzaroaren Zerbitzuetako, Busturialdeko Mankomunitateko Gizarte Zerbitzuetako eta Biltzeneko langileak zein Eusko Jaurlaritzako Familia Politikako eta Aniztasuneko Zuzendaritzako kideak zeuden. Gizarte-elkarteei dagokienez, honako hauetako talde teknikoko profesionalak joan ziren: Cáritas Bizkaia, Gurutze Gorria, Kosmópolis, Adiskidetuak, CEAR, SOS Gipuzkoa eta CITE (CCOO sindikatuaren baitan dago).

Saioaren helburua adingabeekin lotuta Errumaniako legeriak dituen prozedura eta berezitasunak gerturatu eta argitu ahal izateko gunea egokitzea izan zen eta, bereziki, gai hauekin lotuta: dokumentazioa familiako gatazka kasuetan eta Errumaniako herritarrek Espainiako nazionalitatea eskuratzearekin lotutako dokumentuen legeztapena eta horrekin lotutako beste alderdi batzuk.

Jardunaldira joandakoek topaketaren inguruko oso balorazio positiboa egin zuten. Bestalde, Errumaniako kontsul txit gorenak, Marian Popescu jaunak, ekimena lankidetza estuagoa izateko eta Gizarte esparruan erreferentziako erakunde eta elkarteekin lan-ildo jasangarria izateko abiapuntua izan zela aipatu zuen, eta bereziki haurtzaroarekin eta nerabezaroarekin lotutako esparruan lan egiten duten elkarteei dagokienez.

Ertzaintzak EAEn  garatu duen Prebentzioa Komunikaziotik segurtasuneko hedapen-programaren urteko ebaluazioaren eta balantzearen azken bileran hartu du parte Biltzenek. Ertzaintzaren goi mailako arduradunez gain, Iurretako egoitzan egindako topaketaren sustatzaile eta anfitrioi izaeran, beste kargu eta programako arduradun batzuek hartu dute parte ekimenean, baita aldi horretarako gonbidatutako LGBT taldearen eta ijito-elkarte mugimenduaren ordezkariak ere.

Biltzenek joan den urrian hasitako eta Ertzaintzako borondatezko pertsonei zuzendutako Aniztasunaren Kudeaketa Polizialari buruzko prestakuntzarekin jarraitzen du. prebentzioaren eta herritarren segurtasunaren inguruko hainbat arloren gainean eta hainbat publikori, beste batzuen artean, eskola-adinean dauden haurrei eta gazteei, lan-jardueraren baitan informazio-hitzaldiak eta sentsibilizazio-hitzaldiak emateaz arduratzen diren 250 agente inguru dira.

Aniztasunaren Kudeaketa Polizialari buruzko ikastaroa, 36 orduko ordutegi-kargarekin, hiru mailatan dago banatuta: hasierakoa, aurreratua eta goi mailakoa. Horietatik, dagoeneko, lehenengoa eskaini da eta duela gutxi hasi dira bigarrena eskaintzen. Horretarako guztirako, Eusko Jaurlaritzaren Segurtasuneko eta Enpleguko eta Gizarte Politiketako Sailen arteko akordioaren ondorio gisa, Euskadiko hainbat ijito-elkarteren eta LGTB talderen arteko elkarlana nabarmentzen da; horrela, aniztasunaren ikuspegia txertatzen da hiru ikuspegi hauetatik: etorkina, ijitoa eta LGTB, beste elkarlan batzuk dakartzan aniztasunaren planteamendu inklusiboarekin bat etorriz. Hori da tratu-berdintasunerako eta bereizkeriarik ezerako sarearen kasua.